Bros og blíða í Skagafirði.

Góðan daginn.

 Helgina 24-26 júli fór fram hið sígilda Skagafjarðarrall og mættum við systkinin þangað galvösk í leit að góðmálmum. Rallið sem Bílaklúbbur Skagafjarðar á veg og vanda að, stóð yfir í 2 daga og var leiðarval einstaklega glæsilegt þetta árið.

Danni og Gerða fóru í annálaðan ljósmyndabíltúr á evo5 - sem reyndar endaði með þvi að myndavélin datt í gólfið á rallýbílnum og var minna notuð eftir það en til stóð. Gerða tók sig til og las leiðarnótur af miklum móð og stóð sig með stakri prýði við lesturinn. Vakti það henni þó nokkra furðu að nóturnar voru yfirleitt búnar langt áður en bíllinn kláraði leiðirnar -- en það var aukaatriði :) Mikil gleði og hlátrasköll yfirgnæfðu drunur bílsins oft á tíðum og rallið var klárað með sóma án þess að svo mikið sem að líta á bílinn eða skipta um dekk alla keppnina.

Marri og Jónsi mættu á sínum Sjérljótskí og reyndu að hrella aðra keppendur sem mest þeir máttu allt rallið. Óþarfa innilokunarkennd súrefnis í hjólbörðum bílsins á Mælifellsdal olli því þó að þeir náðu ekki verðlaunasæti í þetta skiptið - en skemmtileg tilþrif og flottur akstur skilaði þeim alla leið í mark.

Ásta og Tinna áttu þessa keppni með húð og hári. Þær mættu norður - reyndar ekki skælbrosandi því fýlupoki fretsson hafði hreiðrað um sig hjá Ástu í undirbúningi rallsins. Það kom þó ekki að sök því á föstudagsleiðunum sýndu þær fanta akstur og misstu margir andlitið við að fylgjast með þessum litlu skvísum á bleika bílnum sínum með allt í grenjandi botni. Á öðrum degi urðu þær fyrir því óláni að bremsugeta bleika fór þverrandi og endaði það með ósköpum þegar þær kútveltu í endamarki annarar leiðar dagsins. Góð ráð voru dýr - en bíllinn var barinn saman og stelpunum hent um borð á ný og rúðulausar í rigningunni á ansi krambúleruðum bremsulitlum bílnum gerðu þær sér lítið fyrir og kláruðu rallið í 2. sæti jeppaflokks og hlutu að launum að vera útnefndar "maður keppninnar" :)

Allt okkar fólk - service menn og konur, keppinautar og aðrir fá sinn skerf af þökkum fyrir frábæra helgi. :)

Myndir frá keppninni eru hér: http://hipporace.blog.is/album/skagafjardarrally_2009/

Ekki er hægt að skrifa um þetta rall án þess að minnast á hversu vel að því er staðið og hversu gaman það er að koma í Skagafjörð. Bílaklúbbur Skagafjarðar og meðlimir hans eru sannar hetjur, metnaðarfullt fólk í hverri stöðu! Kunnum við ykkur ómældar þakkir fyrir eljuna ár eftir ár.

 Knús frá flóðhestastóðinu.