Kærkomið sumarfrí - :)

Góða kvöldið.

 

Nú erum við kominn heim og allt eins og það á að vera. 7 vikna sumarfrí framundan sem eru bestu fréttirnar.

Keppni helgarinnar var öðruvísi - lengi vel leit út fyrir að við kæmumst yfir höfuð ekkert í keppnina því bíllinn var eins og lesendur vita ekki klár fyrr en morgunin sem keppnin hófst - og samt var hann ekki klár því ekkert náðist að prófa hann fyrir fyrstu sérleið. Við ákváðum að nota keppnina til að laga bílinn til, klára fínstillingar og uppsetningu og keyra úr honum hrollinn. Eftir svona stórt tjón og rosalega viðgerð þá eru margir hlutir sem þarfnast aðhalds og nýttist keppnin því afar vel í að koma öllu í stand. Við ákváðum að hætta keppninni þegar mjög lítið var eftir - en lítill vandi hefði verið að halda áfram og klára - en við töldum þetta komið gott. Öxullinn sem hrökk í sundur var sannarlega afleiðing tjónsins í síðustu keppni og teljum við að nú sé búið að finna allt út sem þarf.

Mest hissa vorum við þó á hversu þokkalegir tímarnir okkar voru miðað við aðstæður og aksturinn á okkur. Við Ásta náðum ekkert að slípa okkur saman fyrir keppnina, sáralítið að vinna í leiðarnótum og höfðum ekki keppt saman í nærri átta mánuði. Þessi stelpa er algjört undur, vann eljusamlega að nótugerðinni meðan við reyndum að koma bílnum saman og stóð sig eins hetja - engu líkara en við hefðum keppt síðast saman fyrir viku.

Þó að margir séu svekktir yfir því að við gátum ekki beitt okkur 100% núna þá erum við hæðstánægð með helgina. Það er ekki rispa á bílnum og hann stórbatnaði eftir því sem leið á keppnina og við lagfærðum og fundum út bilanir.

Nú er sumarfrí framundan sem verður nýtt í að láta brotin bein gróa almennilega og ná sér í fullt form fyrir seinni hálfleikinn. Ásta verður þó kominn undir stýri á jeppanum sínum strax næstkomandi föstudag þegar önnur umferðin í Íslandsmótinu í Rallý fer fram - en hún keppir þar ásamt 18 ára jafnöldru sinni :)

Við höldum áfram að setja inn fréttir og myndefni í vikunni :=)

 DS