Flóðhestar á fleygiferð

25.2.2008 | 15:16

Lýsi eftir lukkudísunum!

Góðan daginn.

Þá erum við komnir heim á klakann eftir skinin og skúrina um helgina. Lesendum þarf sennilega ekkert að bregða við þegar minnst er á gremjuna yfir óláni helgarinnar - grátlegt vægast sagt.

Í sem styðstu máli þá er þetta eins og stöngin hjá Völu Flosa hefði brotnað í úrslitastökki í alþjóðakeppni - enginn annar séns, engin grið. En svona er þessi íþrótt - einmitt það sem gerir hana að einni þeirri erfiðustu sem kostur er að taka þátt í. Allt þarf að ganga upp, bíll, áhöfn, heppni, hæfni, agi, skynsemi og svo framvegis. Allir pólar þurfa að ganga upp og vinna saman til að árangur náist.

En ljósi punkturinn er samt til staðar - ekkert er svo slæmt að ekki sé ekki eitthvað jákvætt við hann.

Við erum á hröðum bíl - það er ljóst. Við getum unnið á alþjóðagrundvelli, ekki annað eða þriðja sætið nei, Unnið. Við höfum getuna, metnaðinn og grimmdina til þess - einnig höfum við mikla þörf til að sanna það til að ná að klára fjármögnun á tímabilinu. Stefnan er sett á sigur í Border counties rallinu - ekkert minna sem lagt verður upp með! Hvort það takist verður svo bara að koma í ljós en okkur er lofað mikið betri rásstað en nú um helgina og ætti það eitt og sér að vera mikill munur.

Tækniæfingar vetursins ásamt þolþjálfunum eru augljóslega að skila sér með öruggari akstri og hraðari. Það er ekki rispa á bilnum eftir keppnina um helgina og er það sennilega í fyrsta sinn sem það nægir að bóna til að gera yfirbygginguna klára fyrir næstu keppni.

Við munum ekki fara neitt nema hraðar í framtíðinni á þessum bíl - það er enþá svo mikið að læra á hann, getu hans og slíkt. Nú þegar er búið að setja upp æfingaráætlun á bílnum fyrir næsta mánuð sem ykkur verður kynnt hér á vefnum.

Vonandi standið þið Íslendingar áfram svona dyggilega við bakið á okkur og hjálpið okkur í gegnum hremmingarnar. Við munum sigra að lokum!

Kveðja / Danni

Flokkur: Bloggar | Breytt s.d. kl. 23:26 | Facebook